Plum's Baking Studio

Sunday, August 27, 2006

閉關自"修"的一天
















今日唔知黐咗邊條線, 突然想整包又想整蛋糕, 最後用咗半日時間整咗呢3樣"杰"作, 有芝士火腿包包, 藍莓鬆餅同埋提子合桃蛋糕, 整完之後成個人散晒, 好攰呀!!

Friday, August 25, 2006

麵包課第五堂之奶油椰絲包 & 菠蘿包
















用咗臭粉做皮嘅菠蘿包, 唔好以為好臭, 其實剛好相反, 出爐時一陣陣香味......唔理得咁多啦, 肥就肥啦, 食咗先至講!!
















好鬼肥嘅奶油包包呀!! 仲要係用"馬芝連"整嘅, 真係易入難出呀, 驚驚呀!!

Friday, August 18, 2006

麵包課第四堂之杏仁吉士包 & 南瓜包

















都幾好食, 不過我係指d杏仁好食咋!!
















難食到嘔嘅南瓜包, 緊係啦, 事關用嘅係本地南瓜呀嗎!!

Friday, August 11, 2006

麵包課第三堂之大麥, 小麥包 & 粟米牛肉包


















好笑阿sir今堂無返學人走堂, 淨番"小許"同埋一個學師仔响度支橕大局, 雖然"小許"唔算係有問必答, 而且有時仲帶你遊花園, 問非所答, 好似我地問佢整麥包所用嘅黑水係咩野同埋點整出嚟, 佢都唔肯講, 可能呢d就係所謂嘅商業秘密啦, 好彩响其他方面佢都好循循善誘咁教咗我地好多野, 算啦, 咁就放佢一馬啦!

Thursday, August 10, 2006

木瓜奶mousse cake
















約咗car car 慶祝佢生日, 特登為佢預備咗呢個蛋糕, 貪佢夠清新唔太甜, 而且仲低卡路里, 食多d都唔會怕肥, 夠晒健康, 就連奄尖大少黃威耀都話好食, 唔似上次果個朱古力mousse咁漏, 最好笑係car car話見到個蛋糕粉橙色好似d未煎嘅午餐肉咁喎, 真係比佢激死!!

Sunday, August 06, 2006

以餅會友


















好正嘅法包! 不過要走先所以無我份!

















Dark Chocolate Dome ~ 個橫切面好靚, 層次好分明!

星期日去咗一個餅友屋企學整餅, 去到佢屋企簡直嚇咗一跳, 因為佢間屋直頭係一間studio咁, 任何你嗡得出嘅材料同埋用具佢都有, 可為一應俱全, 而且呢位餅林高手同佢老公都好nice, 教我地整餅之餘仲整埋羊肶我地食, wow...好開心呀! 希望不久嘅將來可以再見!

Friday, August 04, 2006

麵包課第二堂之車輪包, 提子方包 & 吞拿魚包



















今堂整嘅包我最鐘意係吞拿魚包, 因為佢有涵响裡面, 勝在可以醫肚但又唔怕太漏, 而且有涵嘅包, 响包嘅時候係須要講求技巧, 包得唔好嘅話, 個包包就會"嘔"番晒D涵出嚟嫁啦, 所以點都要包實D, 師傅仲教我地整三角型嘅造型添!! 都好易整嫁咋, 你地都不妨試吓啦!!

Wednesday, August 02, 2006

芝士蒜茸包
















上堂時師傅仔"小許"比咗D蒜茸牛油我拎番屋企, 咁我咪攞佢嚟再自己練習整多一次, 睇吓同上堂時整嘅比較吓有咩野唔同, 發覺自己响屋企整嘅都OK好食, 不過整造型就仲係好生手, 真係要多D練習至得囉!