Barbie's birthday cake

搬遷啟示

等等等等等......足足等咗幾日都仲未update到個blog, 唔再等啦, 我決定搬啦,

免按金又免租添, 點解唔搬姐, 唔捨得都係咁話啦!

以後大家就去呢度搵我啦:

http://hk.myblog.yahoo.com/plum-bakingstudio

北海道冬日浪漫之旅 ~ 16/12

First Day ~ 香港--->北海道扎幌

Peanut Butter Dome with Cream Brulee

上個月已預早約定小堡主同埋Vanlily一齊學這款圓dum dum cake, 想學嘅原因係因為未食過用peanut butter做嘅蛋糕, 唔知會係咩野味, 加上裡面仲有燉蛋添, 所以咪引到我去學囉, 今堂輝sir心情唔錯, 加上我地全班學生都唔係初學者, 所以佢全堂都無發脾四兼有問別答, 咁就乖啦!! 上堂時咁啱見到藍藍同埋maymok都係同一班, 好開心呀, 除此之外仲有一個神秘blog友都係同一班, 佢係邊個? 佢咪mabel囉, 我地真係有緣啦, 早知咁多人都去學就一早包班啦! 講番個餅先, 其實味道嚟講都好好味, 不過個人則認為甜咗d, 而且d花生醬嘅味道太搶, 令到中間嘅cream brulee無晒蛋味, 不過好彩個口感都仲好滑, 如果可以食前雪凍少少會更好!

忌廉卷蛋

個爐又是唔生性, 爐溫過高, 攪到個面乾得滯側面有D裂開, 激死! 不過味道卻係超正, 都係多得阿堅嘅食譜, 要整多幾次至得, 希望下次個爐乖D聽話D, 如果唔係就劏咗佢!(>_<)

Happy Birthday to 99

今天一家人同奶奶慶祝生日, 本打算整壽包, 卻因為沒有預備適合的材料, 而最終改回整蛋糕, 這蛋糕表面上看來像是一般的忌廉蛋糕, 但實際上是一個椰香mousse cake, 蛋糕底則做了兩種不同口味, 一層是鬆軟的海綿蛋糕, 而另一層則是煙靭的朱古力棒子薄脆蛋糕, 兩種不同口味的蛋糕加上椰香mousse的清新, 想不到竟是如此合拍, 就這次經驗給我知道, 有時亂打亂撞也許會有意想不到的驚喜

蝦子餅牛一

雖然今天是老公的生日, 但是我都無特別準備, 蛋糕沒有整, 就連禮物也沒有買, 原因是這幾天公司有幾個project 要跟, 所以將全副精神也放在工作上, 而另一方面我亦真的找不到合心水的禮物, 以至最後都兩手空空, 故決定請老公吃一頓豐富的晚飯來補償, 最後我們選擇了黃金海岸的香辣屋, 那裡的氣氛還好, 但至於食物的質數則只屬一般, 與淺水灣那間實在差太遠了, 我看應不是同一間, 只是名字相同吧了, 唯有下一次醒目幫襯淺水灣那一間!!

由上而下為:泰式青咖喱雞, 香酥油餅, 印尼什菜沙律, 牛油雞翼, 冬陰公湯(忘記影)

心情天氣

近排天氣很反常, 已接近12月但天氣還是很悶熱, 一陣陣微雨令本來很鬱悶的心情變得更鬱悶, 加上連續兩天也頭痛非常, 真正原因有兩個, 1) 天氣問題影響, 2) 蝦子餅快將生日, 頭痛著不知送甚麼禮物, 朋友們, 請幫忙想想有甚麼提意吧, 好讓我的頭痛可快些停止!

夏威夷果仁曲奇

今日見無咩野做, 悶悶地但又唔想勞師動眾攪大製作, 咪整個簡單而快捷嘅曲奇囉, 為免太單調就加咗D夏威夷果仁, 食落又幾好味喎, 下次又要試吓放第二種果仁先!

Raspberry Jelly Chocolate Mousse Dome

既然係好朋友William生日就當然要整個cake賀一賀, 但是整這個cake是非常有壓力的, 事關這位壽星公是一名名副其實的佰彈斎主, 所有經他品嚐過的食物, 例必有彈無讚, 嚴重咀剔, 本來不打算整, 誰知Jimmy一個電話打來說無論如何也要做一個, 當時心想著: 死啦, 真係要整呀? 呢次整咩好呢? 算啦, 死就死啦, 雖然有壓力, 但點都要解決! 最後決定整最易整嘅chocolate mousse cake, 為免太單調, 中間加了一層raspberry jelly等大家不會覺得太漏, 本來成個過程都很順利, 直至到淋朱古力面時, 意外才發生, 因這朱古力淋面的材料是需要加入可可粉, 但我家的可可粉原來已過期我仍蒙然不知, 而且還要在淋面之後我才發現, 為時已晚, 唯有叫大家食時刮走朱古力淋面才食, 但他們最後也照食沒有理會, 就這件事之後, 我已將家裡所有材料徹底檢查, 且已將全部過期材料丟掉, 所以朋友們, 你們請放心吧, 以後不會再有同類事情發生了!Hehe!

七穀Crossover义燒, 咁都得?

患上嚴重感冒的我睡了一整天, 終按捺不住, 整包的神經在不斷叫喚, 在精神散渙的情況之下, 做了這個不知所謂的七穀 + 义燒做涵的包, 出爐後忍不住吃了一大口, 一邊吃, 一邊不停傻笑, 你們猜猜我為什麼在傻笑....答案明天揭盅!!

答案就係.....原來Ｄ七穀粉過咗期嫁, 人地寫住05年12月到期, 我竟然會睇錯, 以為係06年至到期, 所以當我食第一啖時, 就食到個包有陣"益"味, 仲唔即刻"口累"番出嚟, 淨係識得响度喪笑, 你地話我係唔係病到short咗呀?　　

熱情到令我發燒的蛋糕

不知是天氣轉變還是自己身體潺弱的關係, 這陣子一直在病, 就連整餅做包的心情也沒有, 但見一眾包友也興致勃勃地嘗試做這個一至好評的熱情果雪芳蛋糕, 心想自己不如也弄一個, 看看熱情果能否令我的心情好轉起來, 果真是名不虛傳, 焗這蛋糕的時候, 一陣陣果香的味道飄盪空氣中, 令我的嗅覺神經為之一振, 更意想不到的是熱情果的熱情能令我的體溫急升(發燒), 我看它的威力真的不可少觀啊!!

薑汁蛋撻

用了阿堅嘅食譜, 自己加入了少許薑汁, 就成為了這個薑汁蛋撻啦, 但還是不夠薑味, 下次再整時要加多一點才可以, 而糖也可減少一點, 那就不怕吃多一點!!

花花世界

因為時間實在太緊迫, 所以臨出門口前忘記留下殘影, 到了party現場才求其拍了一張, 整這個蛋糕用了很多時間, 而且過程中出現很多意外, 老實說自己也有點失望, 還幸主人家沒有半點嫌棄!! 在此再一次向這位朋友說一聲"生日happy"!!

日式芝士蛋糕

出爐啦!千祈唔好變皺皮呀婆呀!>_<
















好彩姐, 個面好平滑, 一D皺皮都無!!
















成個食鬼咁, 真有趣!!

用咗幾個配方混合而成嘅呢個食譜好掂呀, 好食之餘, 連外觀都一樣ok, 本來好担心出爐後個面會變皺, 好彩最後無事, 熱食嘅時候好香芝士味, 質地好綿密, 入口即溶, 而雪凍嚟食就好滑, 有口感, 但又唔會太漏, 總之一句講晒就係正啦! 所以下次再整要一次過整幾個至得啦, 如果唔係就肯定唔夠喉lu!!

Comment內附食譜

極品和牛

阿拉斯加長腳蟹大戰極品和牛, 唔~真係好好味呀!!
















嫌仲未夠喉呀? 不如嚟多個round呀!

一早約定家姐一家三口同姐夫慶祝生日, 經過一輪商議後決定去剛旋風抵達本港, 出名好味嘅Lawry's the prime rib度食, 點知打去訂位時, 佢地話D Booking已經去到下個月尾, 嘩, 駛唔駛咁誇呀, 無計啦, 佢D牛扒咁出名, 實有好多人慕名而來啦, 所以我地唯有退而求其次, 決定去幫襯另一間任食和牛Buffet嘅牛扒專門店Mr. Steak, 原本諗住未必Book到位, 點知又好好彩地比我地book到, 做得成牛魔皇, 就緊係要勁擦一頓啦! 其實果度每日都有一款指定+一款每日都有嘅牛類任食, 而今日嘅配搭就係極品和牛&澳洲安格斯牛扒, 兩款都各有特式, 本人則較為喜歡和牛嘅口味, 肉質鮮嫩有口感, 但稍嫌多筋, 另外用Rosemarry焗製嘅阿拉斯加長腳蟹都是一個不錯嘅選擇, 其他食物還有壽司魚生類, 蠔類, 多款中西美食以及多款甜品, 以每位只收$269的價錢來說已算超值, 大家可不妨一試!:p

芝士棒

見悶悶地無咩野做咪睇吓有咩材料响雪櫃, 才發現有一包芝士就嚟過期, 所以立即開"爐"作法, 諗住一次過用晒佢唔好咁浪費, 雖然呢款包包(嚴格嚟講唔算係, 似係餅乾類多D)唔係咁難整, 之但係為咗能令佢乾爽脆身D, 就要焗兩次至做到呢種效果, 而事實亦證明係真嘅, 因為我將第一次焗完嘅棒棒抽起部份再焗, 一日後再同無番焗果D比較, 發覺有番焗果D係脆卜卜好多, 所以話功夫一步也不能少, 對於我來說, 實在是至理名言!!

終於成功啦!

只用了10個大洋換回來的有型木模!!
















與正牌義美相比已有9成相似, 以後想吃時也可自家做,不求人了!!

本來想著再用那個有問題木模再試焗一次我的失敗之作"義美蜂蜜蛋糕", 但剛巧給我在吉之島10元店碰見一個同類型的木模但size較小的, 心想只用10元的價錢那麼便宜, 一試無妨, 誰知一試就掂, 早知如此就不用浪費之前那100大元買回來但用不到的那個"貴"模, 所以有時平野不一定等如不好!!

義美蜂蜜蛋糕零失敗之迷

淨睇面頭好似無乜事, 但請睇埋下面果張就知......
















焗完出嚟成個模底變咗黑色, 仲要點洗都無辦法洗得甩, 最慘係成個蛋糕唔要得, 因為唔知點解個蛋糕焗完出嚟有陣酸味, 仲要係澀眼果隻, 就連平日自稱垃圾桶嘅蝦子餅食咗一啖都忍唔住即時"nur"番出嚟, 所以我決定會拎個模返去果間舖度同佢地理論!! 欲知後事如何, 請看下回分解.....

麵包課第十堂(終極篇)

原本最後一堂係整造型麵包, 之但係阿sir話造型麵包淨係玩吓就得, 如果諗住食嘅就唔好啦, 因為個包係好硬嫁, 所以我地一班同學最後決定淨係焗午餐肉包, 起碼呢個包可以放得入口呀嗎!!
















小許試範嘅牛油曲奇, 既鬆脆, 又好味!!
















范sir即場試範嘅Pizza, 淨係得個樣, 其實又乾又硬, 真的很難吃!!

大壞蛋事件

原本諗住用雪柜裡面剩餘嘅8隻雞蛋嚟整"義美"蜂蜜蛋糕, 點知D蛋唔生性, 開8隻有6隻已經壞咗, 可惡呀, 你地呢班正一大壞"蛋"呀, 攪到我整唔到蜂蜜蛋糕, 點算好呢, 最後唯有用果兩隻好蛋整咗呢個海綿蛋糕仔啦, 出爐啦!! 點知丘生走埋嚟講咗句:咦, 隻馬騮仔幾得意喎!! 吓, 唔係呱, 咁都睇唔出果隻係Bear Bear, 唔係呀化??(~o~)

期待已久的聚會

冰雪聰明而又有內"涵"嘅冰皮月餅!!
















迫到無晒位, 攪到面容扭曲嘅菠蘿义燒包, 慘慘!!!
















我最鐘意食嘅咖哩牛肉包, 夠晒辣, 啱晒我!
















成個蘋果咁, 唔駛講都知係蘋果包(湯種)啦!
















好味又易整嘅Mrs. Field Cookies!

今日成班嘩鬼上咗八八屋企開"檀"作法, 攪到佢成間屋七角咁亂, 幸好一班嘩鬼非常齊心, 合力泡製出五樣美食之後就快手清潔現場, 最重要係多得八八嘅老公諸事丁幫手清洗所有器皿工具, 真係萬分感激, 時間真係過得好快, 離開時已經是晚上6時多點, 大家都懷著依依不捨嘅心情, 期待下一次嘅聚會可以快點來臨!!

麵包課第九堂之芋頭包 & 飛碟包

點解見唔到D芋頭包同埋飛碟包嘅, 原因係我唔想等到咁夜至放學, 所以咪淨係攞咗呢個磨菇雞包囉, 而呢個包仲要係上一堂整唔成, 今堂補番比我地嫁咋, 不過有得補番都好過冇, 為免再有同類事件發生, 今次呢個雞包唔再落咖哩粉啦, 大家可以放心! 上呢個班上到悶死人啦, 快D完就好啦!!

朱古力花球

好難整呀! 整到我頭都大晒呀, 整完之後我變咗個大頭仔呀, 希望下次再整會整得好D啦! 上堂嘅時候發現幾位網上餅友, 佢地都玩得好開心, 而且個個都係靚女一族, 人又靚, 整野又叻, 真係羨慕死人囉!^0^

麵包課第八堂之炸蛋球 & donut

酒樓成日見到嘅沙翁, 咪就係呢D囉, 好易整嫁咋, 不過用油炸就唔係咁健康, 小食為妙!
















整唔到咖哩雞包, 唯有改整donut啦, 真失望!

食得落肚嘅大鼻鋼牙

實在太鐘意呢兩隻野啦, 一見到佢地嘅曲奇模, 立即飛撲埋去買, 點知後尾發現買貴咗, 有D唔開心添, 不過算啦, 鬼叫自己衝動咩, 心頭好呀嗎, 無計啦!!

麵包課第七堂之火腿蔥包 & 墨西哥包

食一個都飽晒嘅火腿蔥包, 你都整番個呢(^0^)
















名附其實嘅孖寶兄弟, 睇真D似Kerropi果對眼多D喎!!

"餅"林大會

一直以嚟都好想學整月餅, 义燒包同埋壽包, 事關月餅可以用嚟送禮, 义燒包又係我嘅至愛, 壽包又夠得意, 所以今次嘅聚會我舉腳支持! 哈哈!!
















想食咩? 等吓先啦, 事關要等佢回油至好味嫁!!
















大壽包包住D細嘅細壽包响裡面, 好得意呀, 下次有人生日可以多個選擇, 唔駛成日整蛋糕啦!






























我至愛嘅义燒包呀, 一出爐就比我地一人掃走幾隻, 食完都唔覺滯, 事關阿堅沖咗壺靚茶比我地飲, 好正呀!!

P.S. 特別鳴謝兩位主人家嘅熱情款待!!

麵包課第六堂之牛油千層 & 號角包

牛油千層係好好食, 不過都有名比你叫啦, "牛油千層"呀嗎, 咪即係用千層嘅牛油嚟整囉, 好肥嫁!!
















阿sir攞咗D佢响酒店整嘅西式包請我地食, 有好多款式, 我個人最喜歡係香草薯仔包, 好香好好食呀!

閉關自"修"的一天

今日唔知黐咗邊條線, 突然想整包又想整蛋糕, 最後用咗半日時間整咗呢3樣"杰"作, 有芝士火腿包包, 藍莓鬆餅同埋提子合桃蛋糕, 整完之後成個人散晒, 好攰呀!!

麵包課第五堂之奶油椰絲包 & 菠蘿包

用咗臭粉做皮嘅菠蘿包, 唔好以為好臭, 其實剛好相反, 出爐時一陣陣香味......唔理得咁多啦, 肥就肥啦, 食咗先至講!!
















好鬼肥嘅奶油包包呀!! 仲要係用"馬芝連"整嘅, 真係易入難出呀, 驚驚呀!!

麵包課第四堂之杏仁吉士包 & 南瓜包

都幾好食, 不過我係指d杏仁好食咋!!
















難食到嘔嘅南瓜包, 緊係啦, 事關用嘅係本地南瓜呀嗎!!

麵包課第三堂之大麥, 小麥包 & 粟米牛肉包

好笑阿sir今堂無返學人走堂, 淨番"小許"同埋一個學師仔响度支橕大局, 雖然"小許"唔算係有問必答, 而且有時仲帶你遊花園, 問非所答, 好似我地問佢整麥包所用嘅黑水係咩野同埋點整出嚟, 佢都唔肯講, 可能呢d就係所謂嘅商業秘密啦, 好彩响其他方面佢都好循循善誘咁教咗我地好多野, 算啦, 咁就放佢一馬啦!

木瓜奶mousse cake

約咗car car 慶祝佢生日, 特登為佢預備咗呢個蛋糕, 貪佢夠清新唔太甜, 而且仲低卡路里, 食多d都唔會怕肥, 夠晒健康, 就連奄尖大少黃威耀都話好食, 唔似上次果個朱古力mousse咁漏, 最好笑係car car話見到個蛋糕粉橙色好似d未煎嘅午餐肉咁喎, 真係比佢激死!!

以餅會友

好正嘅法包! 不過要走先所以無我份!

















Dark Chocolate Dome ~ 個橫切面好靚, 層次好分明!

星期日去咗一個餅友屋企學整餅, 去到佢屋企簡直嚇咗一跳, 因為佢間屋直頭係一間studio咁, 任何你嗡得出嘅材料同埋用具佢都有, 可為一應俱全, 而且呢位餅林高手同佢老公都好nice, 教我地整餅之餘仲整埋羊肶我地食, wow...好開心呀! 希望不久嘅將來可以再見!

麵包課第二堂之車輪包, 提子方包 & 吞拿魚包

今堂整嘅包我最鐘意係吞拿魚包, 因為佢有涵响裡面, 勝在可以醫肚但又唔怕太漏, 而且有涵嘅包, 响包嘅時候係須要講求技巧, 包得唔好嘅話, 個包包就會"嘔"番晒D涵出嚟嫁啦, 所以點都要包實D, 師傅仲教我地整三角型嘅造型添!! 都好易整嫁咋, 你地都不妨試吓啦!!

芝士蒜茸包

上堂時師傅仔"小許"比咗D蒜茸牛油我拎番屋企, 咁我咪攞佢嚟再自己練習整多一次, 睇吓同上堂時整嘅比較吓有咩野唔同, 發覺自己响屋企整嘅都OK好食, 不過整造型就仲係好生手, 真係要多D練習至得囉!

自製豬肉乾

其實上個禮拜已經整過一次嫁啦, 不過因為摝得唔夠薄, 攪到焗完出嚟好似成塊肉餅咁, 吸收咗上次嘅經驗之後, 今次識得摝薄d啦, 最後一斤豬肉可以焗到3大塊14吋 x 12吋, 都只不過係22蚊咋, 好過响味X香度買, 一磅要成100蚊呀, 好貴呀! =_=

Comment 內附食譜

麵包課第一堂之方包, 芝麻包 & 芝士蒜茸包

終於等到呢一日啦, 帶住無比興奮嘅心情同八八去上堂, 教我地嘅阿sir講野仲鬼死咁攪笑, 好有幽默感, 一d都唔悶, 初頭我都担心初班會好悶, 好彩上咗第一堂之後已經覺得自己無報錯, 事關阿sir都教得好好, 而且仲有問必答添, 理論同實集兩樣都有, 話咁快3個鐘上堂嘅時間已經過去, 係時候要帶d包包番屋企啦! 下堂再見啦!

Malakoff Charlotte

學整呢款蛋糕其實唔難, 最難係用朱古力嚟整嘅呢座城堡, 因為要過幾關, 是但一關過唔到都會全軍覆沒, 所以整嘅時候就一路做一路驚, 雖然最後都順利咁完成, 但係呢座城堡最後都難逃厄運, 事關被我班黃虫同事一陣就將佢夷為平地lu, 哈哈!!

p.s.响呢度要同今個月生日嘅兩位獅子座同事"玲姐"同埋"小思思"再講聲生日快樂! :)

Mocha脆脆凍

响34度嘅氣溫底下做呢個蛋糕裝飾確實有d難度, d朱古力難凝固不特止, 之後仲要冒險拎出街搭成個鐘頭車程至去到目的地, 心諗個蛋糕去到一定面目全非, 好彩Billy醒目, 識得楂車join埋我, 如果唔係後果就不憾設想啦!! 至於個蛋糕係用剩餘有限嘅朱古力做裝飾, 所以圍邊有d一岩一忽嘅感覺, 而且個餅底焗過籠較為乾身咗d, 所以口感一般, 好彩d mousse都 ok, 不過整體嚟講我認為唔合格, 有待改進, 要多d練習至得啦! 其實呢個蛋糕係為咗歡送Jenny返美國而特登整比佢食嘅, 所以整到咁肉酸, 我覺得唔係幾好意思, 希望佢唔好介意啦, 响呢度順便同佢講一聲"一路逆風"啦, 掛住我地嘅時候就上嚟MSN add我地啦!!

生日禮物圖檻

呢D全部都係我今年收到嘅生日禮物, 好開心呀, 份份好都好鐘意, 睇得出買禮物嘅人係花咗唔小心思, 有我最鐘意嘅大鼻同埋鋼牙相簿+T Shirt, 一對星型狀嘅鑽石耳環, 仲有就係我嘅新拍擋萬能攪拌器啦, 淨係睇相都已經開心死啦, 所以我要响度再同佢地講聲多謝至得!! 多謝晒呀各位!! ( ^0^)

桂花果凍+玉桂甜圈

太耐無焗麵包, 所以有d手忙腳亂, 好彩有個新拍擋幫手, 如果唔係聽朝都未有得食呀, 哈哈!

















魚仔就緊係要用魚圖案嘅碟載至襯啦!! 咁啱我honey打完羽毛球返到嚟, d果凍已經凝固晒, 咪即刻整件過佢歎囉, 不過我覺得佢食得太快啦, 都無嗒真d味道就吞, 蹝晒!! 

遲來的生日小派對

哈哈哈哈........好開心呀, 本來唔"C"服肚仔痛嘅我, 收到呢兩份禮物就連葯都唔駛食, 針又唔駛打都即刻醒神番晒, 勁呀, 好多謝蛋蛋, 八八, 大米(排名不分先後)佢地為咗遷就我, 唔想阻我同思樑哥哥正日慶祝生日, 特登延遲兩日至同我補祝, 仲要送我最鐘意嘅禮物同埋呢個芝麻豆腐Mousse Cake, 真係好感動, 講返個蛋糕先, 個蛋糕係妹子捱咗成晚通宵至整好嘅傑作, 味道清香又不太甜, 芝麻同豆腐嘅味道同顏色又夾, 加上d裝飾又靚又夠創意, 真係要比10個叻佢至得, 唉, 慘啦! 我一邊食就一邊諗, 第日到佢地生日嘅時候我驚我整唔到"槓"有水準嘅蛋糕送比佢地呀, 依家嘅我何止有壓力, 直頭係好大壓力呀, 我睇我都係負責食算啦!Hehe!正當我發緊夢之際, 八八突然又拎出一份我好鐘意嘅野出嚟送比我, 登登登登...就係一幅曬大咗嘅結婚相啦, 好鐘意呀! 真係多謝晒咁多位呀! 响結婚同埋生日呢兩件盛事之後(哈哈), 我覺得自己好幸運, 好幸福, 因為圍繞住我身邊嘅親人, 朋友同埋同事都好錫我, 好照顧我, 每逢我有問題發生, 都會有好多人幫我解決問題, 我想我真係要好好珍惜我呢一份福氣, 希望我呢一份福氣可以延續落去!! ( ^-^)

美麗的回憶

本來呢個花球係要拋比d未結婚姊妹嘅, 但係當時忙到唔記得咗, 哈, 都好, 留番比自己!! 最後都插咗幾日至同佢講bye bye, 一d都冇蹝!

我們的大日子

終於都到咗呢一日啦, 心情嘅緊張又興奮, 好彩整個過程都很順利, 真係多得一班兄弟姊妹嘅幫忙, 响呢度要再一次多謝佢地, 令我們可以完全不用費心地完成整個婚禮, 留下美好嘅回憶!

鋼琴戀曲

我就唔係咁滿意呢幅相啦, 事關係我兒甥女幫我影嘅, 一D美感都無, 好樣衰, 其實呢個蛋糕裡面係椰子Mousse, 食落好清香, 好正, 我好鍾意, 最後仲成為咗我家姐嘅生日蛋糕添!!

Happy Valentine's Day

願天下所有有情人都有一個浪漫嘅情人節, 我就準備咗呢個似慶祝母親節嘅蛋糕送比佢, 咁你又準備咗送d乜野比你嘅另一半呀? 千祈唔好話我知, 準備咗送自己比佢喎, 因為我唔想嘔住, hehe!

Tiramisu Puff

好耐都無新作啦, 最近期嘅作品就係呢個用Puff做嘅Tiramisu, 不過我一啖都無食過, 事關一整好就送咗比人, 嗚嗚.......嗚.....淨係得我整比人, 都無人整比我嘅!

芝士香草麵包

搓呀搓, 撻呀撻, 全身起動, 搓好之後成身汗, 感覺好舒服, 睇住D包包出爐更加滿足, 原來要有滿足嘅感覺係咁易! 呢次我用咗直接發酵法, 焗出嚟嘅面包都好鬆軟, 我特意留咗一個放過夜, 結果發現個包只係有小小變硬, 都ok可以照食, 好野!! 下次如果唔夠時間但又想整面包嘅話, 就可以用呢個方法啦!!

Merry Christmas!!

今晚成班嘩鬼去威廉屋企BBQ, 所以特別準備咗一款有聖誕節氣氛嘅蛋糕拎去一齊慶祝, 呢個蛋糕用咗好多心機去整, 希望佢地會鍾意食啦!　

Chocolate Mousse Cake

有個舊同學生日, 响呢度再同佢講聲生日快樂, 佢話好想試吓我整嘅蛋糕, 所以Order咗個Chocolate Mousse Cake, 佢試過之後不停讚好, 仲拍心口話如果第日我開舖就免費同我設計間舖頭嘅裝修添, 不過條件係以後要整多D好味嘅Cake比佢食, 我就緊係OK啦, 難得又有多一隻白老鼠幫我做實驗, 緊係無任歡迎! 其實今次整呢個蛋糕我唔係好滿意出嚟嘅效果, 事關我响甩模時唔小心跣一跣手high到則邊有少少扁咗, 又因為唔夠朱古力, 所以D朱古力圍邊又整得唔夠密同唔夠靚, 所以好唔開心, 好彩D味道都OK姐, 如果唔係就喊都無謂lu!

Strawberry Mousse Cake

晨咁早起身諗住快D整好個蛋糕可以快D見到兩個契女, 點知等到成點幾都未見有電話到, 咁咪打比佢地嘅娘親囉, 最後就緊係見唔到佢地啦, 事關佢老竇又唔肯放人, 攪到我鬼死咁失望添, 原本整好咗比佢地嘅蛋糕唯有益佢地嘅娘親啦!

My Honey's Birthday

今日係我Honey嘅Birthday, 同佢睇咗場戲跟住去咗食飯慶祝, 為咗比個Suprise佢, 禽晚漏夜整咗個Strawberry Cheese Cake諗住今日送比佢, 又因為佢一早買咗戲飛, 諗住睇完戲至食飯, 所以我唯有趕頭趕命咁, 一放工就返咗屋企拎個蛋糕去間餐廳度放底先至去join佢睇戲, 好彩過程都很順利, 初頭我仲玩佢話我整比佢嘅蛋糕失敗咗, 所以今晚無生日蛋糕幫佢慶祝, 但係後來佢見到個蛋糕就好Suprise同埋好開心, 仲話整得好靚添, 攪到我都開心埋一份!

綠寶芒果Mousse蛋糕

雖然發記已經過咗生日, 但係作為好同事兼老友, 佢出到聲話要我整個比佢食, 當然唔會托手踭啦, 本來佢Order嘅係Tiramisu, 但係因為無買到Mascarpone Cheese, 所以就整咗呢個簡單嘅芒果Mousse蛋糕, 又因為唔記得買檸檬, 但係見屋企有盒綠寶橙汁, 就即時用咗佢嚟做"愛的替身", 好彩食落都 ok啫!

串串金菊夢

母親大人牛一, 特別為佢做咗呢個用青蘋果茸同埋甘菊花茶做嘅Mousse蛋糕, 聽講甘菊係有寧神及舒緩嘅作用, 用料夠晒健康, 所以呢個蛋糕, 大人細佬都啱食, 我D屋企人個個都話好食, 不過我最唔滿意係D花花唧得唔夠靚! 算啦, 唯有下次再唧好D啦!

Pizza Bread & Walnut Raisin Bread

Pizza包包, 見到都流晒口水啦!
















主角終於出場啦, 佢就係合桃提子包, 好香呀!

片片秋葉情

用真樹葉嚟做朱古力模, 我都係第一次試咋, 感覺好natural, 好似真嘅一樣! 比起上次嗰個戀戀醉薔薇, 呢個味道較為清新, 食多一件都唔怕漏!

第二次整嘅芝士果籃蛋糕

今次同3個包友一齊合作整呢個芝士果籃蛋糕真係無得彈, 簡直係美貌與智慧並重, 無論係3/7面, 定係正面都一樣靚靚, wow!

戀戀醉薔薇

阿Mill個女生日, 上次應承咗佢送一個粉紅色嘅蛋糕比佢, 所以呢個用玫瑰花蛋白Mousse+士多啤梨奶凍做嘅蛋糕就啱晒啦! 不過最初我都有d擔心玫瑰花嘅香味太濃, 小朋友會唔係咁鍾意食嗰陣味, 點知個老積鬼話佢覺得玫瑰花配士多啤梨好特別而且仲好好味添, 真係頂佢唔順!

包山包海

嘩! 做乜咁多人嘅, 呀~sorry, 係咁多包至啱, 簡直係"包山包海"呀, 之所以有咁嘅場面, 全賴有我地蛙蛙會會長帶領之下與及一眾會員嘅努力, 先能夠做出既美味又靚仔嘅包包, 所以我地特別舉辦咗一個選舉, 就係"2005年度我最喜愛的包包"競選, 最後經過一輪激烈嘅比賽之後, 終於選出咗全場總冠軍, 登登登凳~就係7號嘅"朱大腸"啦!
















Hi, 大家好, 我係7號"朱大腸", 請各位多多指教!

Banana Pound Cake

男朋友話佢D同事想試吓我整嘅蛋糕, 所以我就整咗呢個既簡單且好味嘅香蕉牛油磅蛋糕啦! 焗嗰陣時D香蕉味出晒嚟, 好鬼香, 成屋都係, 原本諗住一兜整比自己D同事仔食嘅, 點知最後自己忍唔住食咗, 最衰唔夠材料啦, 如果唔係我應該整多兩兜, 無計啦, 唯有下次再整過! 不過個蛋糕我落少咗牛油(因為唔夠)同埋因為無自發粉, 所以落咗麵粉+發粉(都係落少咗), 攪到焗完出嚟唔夠漲仆仆添! 激死!

DIY之友燒烤同樂日

好開心呀! 終於等到呢日啦! 嗰日我地一班DIY之友去咗咖啡灣BBQ, 出席嘅DIY之友有蛙蛙會長, 雞蛋仔, 八掛妹, 大米, 薯仔, Carmen仲有我, 我地大約5點半開始燒, 傾吓食吓話咁快就11點幾, 真係快樂不知時日過, 最後大家都懷住依依不捨嘅心情結束呢一次嘅聚會, 不過我地已經籌備緊第二次嘅聚會, 希望下次會有多D嘅DIY之友出席啦!

花之頌

今朝一早打番屋企, 點知係老竇聽電話, 原來佢出咗院啦, 醫生幫佢檢查過大致上冇乜大礙, 不過驗血報告就仲未出, 但係佢依家可以出得院, 個心都定番D, 所以今晚可以專心去學唧花啦! 今晚Andrew師傅教我地整嘅"花之頌"主要係教唧花嘅技巧, 正所謂工多藝熟, 原本師傅整兩三吓手勢就攪掂嘅花花, 我足足要整成個鐘先至整好, 而且仲唔多滿意添, 睇嚟要練習多D至得啦! 今晚上堂得三個人咋, 唔知係唔係呢個原故, 所以師傅冇乜心機咁! 唔怪之得佢呢輪冇乜上去DIY個Forum度留言啦!( c _ c")
















我就係用呢兩個唧咀唧玫瑰花嫁啦!

青檸寶石Mousse Cake

今日下晏白髮魔女(我阿媽)突然失驚無神打比我話牛丸頭(我老竇)入咗醫院, 嚇到我鼻哥窿冇肉, 好彩白髮魔女仲好鎮定咁同我講話老竇入院係因為血壓太高, 所以要留院檢查, 唉~担心死我啦! 一日最衰就係我老竇成日唔戒口乜都放入口, 聽我阿媽講佢中秋節時D月餅一個一個咁食, 咪卒之攪到咁囉, 所以以後我都唔敢整咁多蛋糕過佢食啦, 一於叫佢改行食斎啦! 本來呢個青檸寶石Mousse Cake係整比佢食嫁, 諗住酸酸地唔會太漏, 但係依家唯有留番比家姐同埋兒甥女食啦!

吞拿魚丹麥酥

折磨咗我幾日嘅智慧牙終於生咗出嚟, 無頂住D牙肉, 舒服晒, 睇嚟可以暫時唔駛剝住, 好野, 心情好自然要整包賀一賀佢! 所以我整咗我嘅至愛"吞拿魚丹麥酥"啦, 焗完出嚟都幾靚仔"厄"到吓人, 不過食落口就覺得唔夠酥脆兼漏得滯, 唔知係唔係焗得唔夠耐呢, 希望下次再整好D啦!

P.S. Zman話D造型好似手指咁喎, 唔係呱, 得4隻手指咁嚇人?

芝心包包

呢兩個包包咪睇佢樣衰衰好似對鞋咁，其實內裏 係包住ｄ溶咗嘅芝士 , 軟綿綿咁幾得意!

法式香草蕃茄芝士飽(湯種)

隻智慧牙痛咗幾日, 個人無晒心機, 醫生話要等隻牙消咗炎同無腫至剝得, 要成1,500蚊嫁, 骨隙都赤埋, 仟五蚊夠我買好多整餅嘅材料啦! 本來呢幾日都好想整包, 但係因為要開O.T.嘅原故, 所以無整到, 始終都要等到今晚 Happy Friday至有時間整, 都好嘅, 事關我焗完D麵包都成12點幾啦, 沖完個涼成點鐘, 好鬼夜 lu, 所以我依家眼瞓到燶, 好彩聽日唔駛返工啫, 好開心我嘅第一個湯種面包終於出世lu, 原本湯種面包係唔難整嘅, 不過我响整嘅時候又唔小心咁落多咗蛋嘅分量以至面團太濕, 所以攪咗兩個鐘至做第一次發酵, 真烏龍! 好彩焗咗出嚟都好軟熟! 好啦! 要瞓啦, 如果唔係虛火上升, 隻牙仲痛多幾錢重添!
P.S.特別鳴謝蛙蛙會長及其他會員嘅協助同鼓勵!

BBQ同樂日

上個禮拜六同同事响天水圍嘅"有义用"BBQ, 我拎咗呢個有朱古力圍邊嘅黑森林蛋糕入去, 由太子坐巴士入去天水圍再轉的士要成1個幾鐘, 一路坐車就一路驚個圍邊會溶同埋會裂, 所以全程冇瞓過係咁拎實個蛋糕, 好鬼攰呀, 好彩最後都順利到達目的地! Thanks god!

P.S.我成日都叫錯"有义用"做"冇义用"(^O^), 我真係冇义用呀, 咁都叫錯!

好香嘅玉桂包包呀!

我上次整咗成晚先攪掂嘅玉桂麵包, 又係因為大頭蝦無睇火, 點知焗完出嚟燶咗d, 不過都好味, 未攤凍就忍唔住即刻食咗一個, 點知第二日即刻爆瘡, 嗚......

一家3口嘅雀巢黑森林蛋糕

呢個蛋糕係我整比我姐夫嘅生日蛋糕, 因為我家姐屋企一家三口, 所以我整咗兩隻大人雀仔同埋一隻雀仔BB代表佢地, 睇落好warm咁! 佢地都話得意呀!

Comment 內附食譜

好好食嘅Mocha脆脆凍餅

呢個蛋糕集香濃軟滑於一身, 點形容好呢....一個字咁簡單"正"呀!

Fresh Fruit Cheesecake Charlotte

阿Mill牛一嘅大日子, 緊係要整番個Cake賀一賀佢啦! 如果唔係下次阿Mill有新咕臣套番都唔送比我嫁啦! 我地仲約咗响九龍城食泰國菜添, Jenny啱啱响美國返咗嚟都有出席, 我地食吓傾吓, 好快就到咗切蛋糕嘅時間, 不過我無準備到蠟燭, 所以唯有用火機點著當蠟燭許願啦! 後尾佢地成班人一陣就食晒個蛋糕, 仲傾到成12點幾至肯走人, 攰死人啦!

橙酒truffle蛋糕

橙酒嘅香加上truffle嘅滑, 真係一試難忘!

鴛鴦香芒撻

用兩隻唔同色嘅芒果做嘅芒果撻, 所以幫佢改咗個名叫做鴛鴦香芒撻!

Strawberry Mousse Cake

呢個蛋糕係整比世伯嘅生日蛋糕, 內裡有好多生果, 食落唔太甜, 好味得嚟又健康!